‑Bo 'ɩn nɩ 'e 'kle 'di 'ma poɛ ‑ma ‑tɩ' ‑kwlʋ o
77
Asafʋ 'a 'dʋ ɔ "nyɩa 'dʋ bleʋn 'a klaa" nyɔ ɔ "dua "i 'de Yedutumʋ "kpei ɛ.
2 Kea mɛ 'ma kpa wlu "jɛi 'ma 'da, 'ɩn 'da 'sʋ ɛ 'wɔɔn.
3 ‑Ta 'kpɩ wa "mii ɛ, Tʋ "bo mɛ 'ma wlu o,
"maʋ ɛ, 'ɩn toɛ sʋn 'de ɛ o,
nyɔ ‑jea 'ʋn ‑tɩ' ‑kwlɩ' ‑tu" ɔ se nɩ‑
4 ‑Bo 'ɩn naa Kea 'a ‑tɩ' tɔ' "kpei 'sʋ 'ma 'wla fɩɩɛ' i,
‑wɛe ‑bo 'ɩn ‑te tɔ' i naa' ‑pʋn" 'sʋ 'ma dɩ a cɛn'. ‑Te' ‑kwlʋ.
5 ‑Bo 'ɩn 'na 'ɩn 'je "nyɩɔn 'kpaa ‑ma nʋɛ' 'ma jea "jriɛ "i ‑te,
tai' "maa 'ʋn 'ɛ dɛ 'ɩn 'jea 'tmʋ ɛ se nɩ‑.
6 'Wɩ ‑sia' ke ‑sɩn ‑sia' mɩ ‑ɩa ‑tɩ' 'ma naa tɔ' "kpei.
7 'Dʋ 'ma blea' ‑too' ‑kwea a,
'dʋ 'ma blea 'ma poɛ ɩa' ‑tɩ' ‑kwlʋ o.
‑Bo 'ɩn pa 'de 'ma ‑cɛ" 'ʋn ɛ, 'ma ‑suu a ‑tee' ɛ 'ma ‑cɛ" i:
8 Kea 'a nyʋ 'bɔɔa 'je 'ʋn ‑kwle ‑o?
Ɛ se tɔ' 'dɔe de jaa i 'sʋʋ?
9 Ɛ 'bɔ nyiɔ nɩ ‑tɩ 'mɛ 'de ‑a ‑pʋn" ‑ae?
Ɛ 'bɔ nyiɔ nɩ ‑tɩ 'mɛ ‑ae?
10 Kea 'bɔ ‑aa "jri 'dɔe ja ‑gbʋn ‑tɩ 'mɛ ‑ae?
Ɛɛ' 'cɛn nʋɛ' ɛ je pɛe kpoi" poo? ‑Te' ‑kwlʋ.
11 Ao ‑gbʋn dɛ 'ɩn 'tmʋa ‑ta 'ɩn nɩa 'de 'kle 'di ɛ ka:
Kea ‑nɩa 'e dɩ ‑wee'‑ "klein "jrukpɔ' 'ɔ nʋ dɛ jrɛ' 'e de ka ɛɛ nʋɛ tɛin" ɛ.
12 'Ma muɛ dɩ Tʋ "bo nʋa 'a ‑tɩ' ‑kwlʋ o poa',
ɩɩn 'ma muɛ ‑ma jrii' "klein ‑ɩn nʋa see 'a ‑tɩ' ‑kwlʋ o poa'.
13 Dɩ klae" klae" "klein ‑ma sʋn nʋa,
'ma muɛ ɩa' ‑tɩ' tɔ' "kpei naa'.
14 Kea, ‑ma nʋʋdɩ ‑kwɛi,
Kea ‑jɛ ‑bɛi" ka ‑mɔ Kea nɩa a‑?
15 Dɛ ‑nʋɛ ɛmɛ ‑nɩ jrii' Kea ‑o;
'De 'blʋa ‑wee'‑ "kpei.
16 Kɩɩn ‑mɔ Kea,
‑ma "ikmaa' mɛ ‑seie ‑ma 'cɛ
Sakɔbʋ 'a "nynuu‑ ke Sosɛfʋ 'a "nynuu‑ ke‑. ‑Te' ‑kwlʋ.
17 "Ni 'jee ‑ʋn "jriɛ 'mɛ
'oo Kea "ni 'jee ‑ʋn "jriɛ 'mɛ
‑wɛe ɩ ‑te i ‑suua' ‑pʋn",
‑gblebie ‑mɩ 'a ‑cɛ" ‑suua' i ‑ke.
18 Bue" ‑mɩ a poɛ "ni klae" ‑sɔn.
‑Wɛe "ni a plan" 'de jaʋn 'di ɛɛ' nɛ ɛ ‑sii' 'ʋn.
19 ‑Tɛn ‑plan" 'de "ni ‑kwea 'mʋʋa‑
ɛɛ' nɛ ɛ nʋɛ' nyɔ ɔ jea 'blʋa ‑wee'‑ i 'je.
Dɛ waa 'blʋa 'dii 'sʋ ɛ ‑teɛ crɛa' ‑pʋn".
20 'Bo 'tɔniɛ ‑kwea 'bo ‑ɩn poo ‑jeblʋ,
'bo "ni klae" ‑kwea 'bo ‑ɩn ‑jaa ‑jeblʋ
‑wɛe nyɔ 'oo nyɔ jrɔ' se ‑ma boun 'a ‑kwɔ 'je.
21 ‑Mɔ ‑jii Moisɩ ke Arɔn 'ʋn
‑wɛe ʋʋ kɔn ‑ma 'cɛ "juɛi
ka nyɔ ɔ kʋan 'blae 'a ‑gbʋn 'dei ɛ.